Gonzalo Moure na nosa biblioteca.

Gonzalo Moure veunos visitar . As Mariñas Lectoras tiveron a sorte de falar con el de libros (dos seus, dos da súa mocidade, dos dos seus amigos), do Sáhara, dos estudos, de traballos, da vivencia oceánica na escrita, de anxos que gustan das bibliotecas... E agasallounos con palabras como estas:

“Ler fainos máis libres”.

“Ler fainos sufrir”.

“O erro é pensar que as riquezas son as cousas”.

“O libro realmente importante na carreira dun autor é o inicialmente máis inútil. Pensemos no Principiño de Saint Éxupery”.

“Para escribir un libro hai que espirse”.

El dedicounos Son un cabalo, e os compoñentes do clube, agasallárono con Palabras de Caramelo e A noite d'O Risón; seus propios libros, si, pero de seguro que agora lle serán, se cadra, un bocadiño máis especiais, pois levan as propias dedicatorias do noso alumnado.

África

Apetécevos viaxar? Ummm! Si, verdade?

Que vos parece un percorrido por Marrocos, Exipto, Kenia, Alxeria? Sentides a calor do sol na pel?

E se seguimos por Mozambique, Ruanda, Sudán?

Que daríades por ver esas postas de sol?

E se nos adentramos en Serra Leona, Gambia,...?

Non vos arrecende a especias, a terra seca, a verxeis?

Sexamos ambiciosos, e por que non toda África?

Non vos preocupedes polos cartos nin polo tempo, atoparedes o vello continente no boletín deste mes: a súa xeografía, as súas xentes, os seus costumes, as súas cores, os seus aromas, as súas linguas, as súas lendas, as súas miserias, as súas ignoradas reivindicacións, as súas esperanzas, o seu pasado, o seu merecido futuro...

As mellores recomendacións de lectura e de cine para saber máis deste marabilloso, descoñecido, olvidado e sorprendete continente.

Á túa disposición na biblioteca ou aquí, no blogue.

Máis preguntas

Cantas espiñas ten o ourizo?
Son os porcos tan cochos?

Son aburridos os ratos grises?

Aos animais, dálles medo a escuridade?

Os coellos reprodúcense como coellos?

Ata onde chegan as formigas?

Choran os crocodilos?

Van os corvos polo ouro?

Na época de celo, as cabras póñense como cabras?

Cantos pés ten o milpés?

É a ovella negra unha marxinada?

Mudan de casa os caracois?

Dormen moito as marmotas?

Nunca está satisfeito o mosquito?

...............................................?

A solución a todas estas preguntas en "¿Tienen los animales que lavarse los dientes?", premio Bolonia de Literatura Infantil 2006.

Por que...?

Por que hai 60 segundos nun minuto?, Por que un metro mide un metro?,Por que circulan os ingleses pola esquerda?, Que significan as letras SOS?, Por que as notas de música se chaman do, re, mi, fa, sol, la, si?, Por que nos damos a man?, Por que o número que calzamos non corresponde ao tamaño do noso pé?, Por que...?

Todas as respostas ás preguntas que nunca te fixeches é unha obra sorprendente que propón máis de 100 cuestións e mostra as súas respostas, tratadas con seriedade... e humor.

Unha viaxe a través da historia, a ciencia e as anécdotas para aprender, interesarse, descubrir... e cachar nas patacas aos país e aos profes! Un libro para consultar mañá, tarde e noite e para sair na procura de asombrosos descubrimentos.

Amizade

"Afecto persoal, puro e desinteresado, compartido con outra persoa, que nace e fortalécese co trato."

Dous son os títulos sobre este tema que nos atopamos entre as novidades deste mes: Cometas en el cielo e Reencontro. Dúas amizades rotas nun momento determinado aínda que por motivos ben distintos.

Dúas boas recomendacións de lectura.

Cometas en el cielo

Khaled Hosseini

Nun país dividido ao bordo da guerra civil, dous nenos, Amir e Hassan están a piques de separarse para sempre. Numerosas cometas, que participan nun torneo infantil, cruzánse no intenso azul do ceo de Kabul. Pero logo de gañar o torneo, a traizón dun neno atemorizado porá en marcha os mecanismos dunha catástrofe... e o comezo dunha procura épica da redención.

Reencontro

Fred Uhlman

Hans é fillo dun médico xudeu e Konradin é un aristócrata descendente dunha das familias máis vellas de Alemaña. As súas afinidades e o seu xeito de ver as cousas convérteos en amigos íntimos. Pero cando Hitler chega ao poder, Konradin entra no exército nazi e Hans ten que marchar de Alemaña.

Libros +

Segundo a enquisa encargada pola Federación de Gremios de Editores de España esta sería a relación dos 25 libros máis lidos no ano 2007:





Na nosa biblioteca podes atopar a maioría deles: La catedral del mar, Los pilares de la tierra, La sombra del viento, El Quijote, El niño con el pijama de rayas, El capitán Alatriste, El perfume, La sangre de los inocentes, El médico, El último catón, Cien años de soledad, Inés del alma mía e El clan del oso cavernario.

A metade máis un. Non está mal, non?

As mulleres da biblioteca dan a cara.

Non, non é que as bibliotecarias nos poñamos farrucas. Iso foi o que pensaron algúns cando viron o cartel na porta da biblioteca. Pero ao entraren, xa se decataron do xogo de palabras. As que dan a cara son ese cento de mulleres que viven nos andeis e que por uns días quixemos que fosen as protagonistas sacándoas do seu encorsetado posto entre libro e libro e colocándoas coa capa de cara ao público. Velaí as tedes, en cada andel algunhas das súas representantes: matemáticas, historiadoras, escritoras, biólogas, filósofas... E, como non, as bibliotecarias tamén. E todas, na vosa biblioteca. Um! "biblioteca", "a biblioteca", igualmente feminino . E vós diredes: si, pero é "blogue", "o blogue". Vale. Mais... tamén... "a bitácora", feminina. Cádralle ben, non si?´

Pearl Buck

Pearl Buck foi unha escritora estadounidense que viviu gran parte da súa vida en China. Escribiu máis de 85 libros, moitos dos cales son novelas que retratan a cultura e os costumes chineses.
A súa produción literaria abarca xéneros tan dispares como o relato, o teatro, o guión cinematográfico, a poesía, a literatura infantil, a biografía e ata un libro de cociña.
Creou tamén diversas fundacións para a unión dos lazos entre a cultura occidental e oriental e defendeu sempre posturas feministas e igualitarias.
En 1932 conseguiu o Premio Pulitzer pola súa obra A boa terra e no ano 1938 o Premio Nobel de Literatura “pola súa rica e exacta descrición da vida rural en China e polas súas obras mestras de xénero biográfico”.

Pearl Buck morreu o 6 de marzo de 1973, fai hoxe 35 anos.

Pearl Buck na biblioteca

Mulleres perigosas na biblioteca

Todas elas en "Las mujeres que escriben también son peligrosas" : Toni Morrison, Isabel Allende, Doris Lessing, Françoise Sagan, Marguerite Duras, Simone de Beauvoir, Marguerite Yourcenar, Ana Frank, Sophie Scholl, Irene Némirovsky, Agatha Christie, Astrid Lindgren, Charlotte Bronte, Jean Austen ...

Mochilas ao bus… !

As mochilas viaxeiras xa están preparadas para a súa viaxe. Destino: o fogar dos usuarios da nosa biblioteca, o voso fogar.
Van cargadas de... libros, como non. Pero non son só para vós, alumnas e alumnos do IES As Mariñas, senón tamén para a vosa familia:
Que tal un libro de filosofía para a irmá rebelde?
E un de historia para a avoa contabatallas?
E por que non?, un de poesía para o papá romántico?
E un de aventuras para a mamá superheroína...?
Quen sabe os gustos dos familiares do noso alumnado (xa nolos sopraredes). As mochilas viaxeiras pretenden achegar a biblioteca escolar á vosa casa, achegar a vosa casa á biblioteca.
Só teñen permiso de estancia de 15 días. Son moitas as paradas por Betanzos e arredores. Será unha longa viaxe, pero van tan cheas de ilusión...!

Boa viaxe lectora!

Buscamos mascota para a nosa biblioteca

Tantos anos de lecturas compartidas e aínda non temos mascota.

Queremos que sexas ti, quen a cree.

Por iso decidimos, xunto coa desinteresada colaboración do Departamento de Plástica, convocar un concurso.

BASES:
-Pode participar o alumnado de 1º, 3º e 4º da ESO.

-Os traballos deberán incluír algún motivo relacionado co tema da lectura, e nalgunha das súas partes aparecerá a lenda: "Biblioteca IES As Mariñas".

-Prazo de entrega dos traballos ata o día 18 de abril inclusive.

-Os traballos presentaranse en tamaño A4 en sobre pechado. Dentro deste sobre grande irá outro menor co nome, apelidos e grupo do alumno o alumna.

-Entregádelle á vosa profesora de Plástica o voso traballo. Ela faránolos chegar á biblioteca.

-Establécense un primeiro premio de 40€ e un accésit de 20€ que se trocarán por libros, música, películas, material deportivo ou útiles de pintura.

-Os premios entregaranse o 23 de abril, Día do Libro, na biblioteca.

-O xurado estará composto polo equipo da biblioteca e de dirección.

Por suposto, o autor ou autora da mascota elexida terá o recoñecemento oficial da biblioteca como creador ou creadora da mascota.

Rosalía máis viva ca nunca

Así a sentimos nos nosos corazóns este luns, 25 de febreiro, na nosa biblioteca.

Rosalía voz, cando alumnos e alumnas do centro recitaban:
“Tecín soia a miña tea,
sembrei soia o meu nabal(...)”

“Non me olvides, queridiña,
se morro de soidás...
tantas leguas mar adentro...
¡miña casina, meu lar!”

“Castellanos de Castilla,
tratade ven aos gallegos;
cando van, van como rosas,
cando vén, ven como negros (...)”

Rosalía canto, cando os instrumentos e as voces se unían en:
“Cando penso que te fuches,
negra sombra que me asombras,
ó pé dos meus cabezales
tornas facéndome mofa (...)

(Tamén podedes escoitar está canción aquí)

Rosalía remozada, cando Monse nos dramatizou a súa vida:
“Nacín tal día como o de onte, hai xa moitos anos, un 24 de febreiro de 1837 (...)”

Rosalía madura, na interpretación de Dores:
“Algúns creron que a miña tristura tiña que ver coa orixe bastarda e sacrílega; pero non é certo, os golpes serían duros e chegarías despois. Escoitade....(...)”

Que mellor día que o de Rosalía para comezar a andaina deste blogue, non credes?

BubbleShare: Share photos - Play some Online Games.