![](https://blogger.googleusercontent.com/img/b/R29vZ2xl/AVvXsEgoMXT64-HM7THv2NZmSVHgfQYcZ78BV6ehdQsAcD6mYuoFq51jD7KhJjFhjZn181zqfuh4e4-bobC8kigdoPR58hTlUagKhuCupCORZDDqnB5xwCz_0d4m4u9rK2II5bdM5rRZliko6FZG/s400/lejos-de-toledo.jpg)
O profesor Albert Cohen, experto bizantinólogo, regresa de Israel ao seu Plóvdiv natal para participar nun congreso.
Unha vez alí, irá rememorando a súa infancia nesta cidade búlgara, entretecendo os seus recordos co reencontro cos seus coñecidos que aínda viven.
Preséntasenos, entón, toda unha galería de personaxes entrañables e inolvidables: Abraham o Borrachón, o seu avó, a avoa Marzal (xudeus descendentes dos expulsados de Toledo en 1492 polos Reis Católicos), o fotógrafo Kostas Papadopoulos (que coa súa cámara participaba en todos os eventos importantes, públicos e privados), o músico Manush Aliev, o mestre Stóichev... e todos os habitantes do barrio do Cementerio do Medio onde convivían xudeus, musulmáns e ortodoxos.
Hai unha mestura de sentimentos que deixa unha sensación extraña no lector: a amargura ante a situación persoal dos personaxes únese ao humor con que se contan as historias da nenez. Pero sempre queda un pouso de tristeza polo "paraíso perdido".